Нийслэлийн Сэтгүүлчдийн нэгдсэн холбооноос хэвлэл мэдээллийн байгууллагын ажилтнуудыг чадавхжуулах  олон ажил, арга хэмжээ санаачлан хэрэгжүүлж байгаагийн нэг нь аялалтай сургалт ажээ.  Аялалтай сургалтын энэ удаагийнх нь Mazaalai nomadic tour аялалын ХХК зохион байгуулж Итгэлт хамба, Байгаль далайг зорьсон бөгөөд хэвлэл мэдээллийн 20 гаруй байгууллагын сэтгүүлч, зураглаач, төрийн зарим байгууллагын хэвлэлийн төлөөлөгч гээд нийт 40 орчим бүрэлдэхүүнийг хамрууллаа. 

       “Мобайл сэтгүүл зүй” сургалтыг Хэвлэлийн хүрээлэнгийн судлаач Т.Есөнтөмөрөөр ахлуулсан мэргэжлийн багш нар гар утсыг мэдээллийн эрин зуунд хэрхэн ашиглах, дэлхийн чиг хандлага, сэтгүүлчдэд хэрэгтэй аппликэйшн программуудын талаар мэдээлэл хүргэж, бүлэг бүлгээр дасгал ажил гүйцэтгүүлэв.

Сургалтын төгсгөлд 2022 онд Орос, Украины асуудлаар сурвалжилга бэлтгээд ирсэн Товч.мн мэдээллийн сайтын сэтгүүлч О.Эрдэнэдаваа сонирхолтой мэдээлэл хүргэв. Тэрээр 20 мянган километрийг туулж, амаргүй цаг хугацаа, хүнд нөхцөлд, халуун цэгээс сурвалжилга бэлтгэхэд учирч байсан бэрхшээлийн талаар мэргэжил нэгт нөхдөдөө хуучилж, шуурхай мэдээлэл бэлтгэхэд гар утас хамгаас чухал үүрэгтэй, гэхдээ чанар байдлын тухайд мэргэжлийн камер илүү үр дүнтэй гэдгийг ч онцолж байсан юм.