Нийслэлийн мэргэжлийн хяналтын ерөнхий газраас Алтанбулаг, Замын-Үүдийн боомтоор дамжин ирсэн ачаа тээвэр, импортын бараанд шалгалт хийж, энэ хяналт шалгалтыг УОК-оос өгсөн үүрэг чиглэлийн дагуу энэ оны гуравдугаар сараас хойш хийж байгаа юм.

Энэ хугацаанд нийт 4533 автомашин, 4756 жолооч дээрх боомтоор нэвтэрчээ. Нийт нэвтэрсэн жолоочийн 3292 нь гадаад, 1464 нь монгол хүн байсан байна.  Одоогоор 177 монгол, нэг гадаад жолоочийг Асралт мед, Наранбулаг, Ар гүнт, Ивээл зочид буудалд тусгаарлаад байгаа аж. Мөн 102 722 800 ширхэг бараа бүтээгдэхүүнд шалгалт хийжээ. Гааль дээр 24 цагийн хяналт тавьж ажиллаж байгаа бөгөөд тээврийн хэрэгслийн гадаргуугийн ариутгал хийгдсэнээс хойш хоёр цагийн дараа сэлгээ ачилтыг хийж битүү талбайд халдваргүйтгэл хийж байгаа гэнэ.

Замын-Үүдийн боомтоор тээвэрлэсэн бараа бүтээгдэхүүнээс дээж авч шинжилгээнд хамруулахад дөрвөн байгууллагын “Сайра” нэрийн нөөшилсөн загаснаас шимэгч хорхой илэрчээ. Хяналт шалгалтын үеэр ОХУ-аас импортолсон 266 кг алимнаас шавж, Голланд улсаас импортолсон гурван төрлийн цэцгийн булцуунаас бөөс илэрсэн байна. Үүнийг газар дээр нь хураан авч, устгалд оруулжээ.