Тулгар төр байгуулагдсаны 2235, Их Монгол Улсын 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Монгол Улсад банкны тогтолцоо үүсэж хөгжсөний 102 жилийн ойг тохиолдуулан Монголбанкны Санхүү, удирдлагын газрын Үйлчилгээ, аюулгүй байдлын хэлтсийн Аюулгүй байдлын ахлах мэргэжилтэн Г.Цацрал, Санхүүгийн боловсрол, харилцааны газрын Санхүүгийн боловсролын хэлтсийн захирал Б.Одонтунгалаг нарыг Монгол Улсын Ерөнхийлөгчийн зарлигаар Хөдөлмөрийн гавьяаны улаан тугийн одонгоор шагналаа.

Г.Цацрал нь 2017 оноос Монголбанкинд ажиллаж байгаа бөгөөд энэ хугацаанд байгууллагын аюулгүй байдлын журам, хамгаалалтын тогтолцоог боловсронгуй болгох, техник, тоног төхөөрөмжийн шинэчлэлийг олон улсын төв банкнуудын жишигт нийцүүлэн үе шаттай хэрэгжүүлэх, ажлын байрны аюулгүй байдал, эрсдэлийн удирдлагыг сайжруулах чиглэлээр үр бүтээлтэй ажиллаж ирсэн.

Тэрээр өмнө нь Монгол Улсын Ерөнхийлөгчийн Тамгын газар, Үндэсний аюулгүй байдлын зөвлөлд ажиллаж, үндэсний аюулгүй байдал, хүнсний аюулгүй байдал, удмын сангийн чиглэлээр төрийн бодлогын баримт бичиг, журам, зөвлөмж боловсруулах ажилд хувь нэмрээ оруулсан туршлагатай төрийн албан хаагч юм.

 

Харин Санхүүгийн боловсрол, харилцааны газрын Санхүүгийн боловсролын хэлтсийн захирал Б. Одонтунгалаг нь Төв банканд 10 дах жилдээ ажиллаж байгаа бөгөөд 2016 оноос одоог хүртэл Монголбанк, Сангийн яам, Санхүүгийн зохицуулах хороо, БСШУЯ-аас хамтран хэрэгжүүлж буй “Олон нийтийн санхүүгийн суурь мэдлэгийг дээшлүүлэх хөтөлбөр”-ийг амжилттай хэрэгжүүлэхэд хувь нэмрээ оруулж, үр дүнд нь их, дээд сургууль, ерөнхий боловсролын сургуулийн сурагчдад “Хувь хүний санхүү” хичээлийг сонгон судлуулдаг болоод байна. Энэхүү хөтөлбөрийн хэрэгжилтийн үр дүнг Олон улсын хүүхэд, залуучуудын санхүүгийн боловсролын байгууллага /Child & Youth finance international/-аас сайшаан үнэлж, Монгол улсын санхүүгийн боловсролын стратегийг 2016 оны Ази, Номхон далайн улсуудын “Бүсийн аварга”, 2019 онд дэлхийн хэмжээнд “Шилдэг түншлэл-2019” улсаар шалгаруулсан. Б. Одонтунгалаг нь Санхүүгийн хэрэглэгчийг хамгаалах хуулийн төсөлд санхүүгийн боловсрол олгох бүлгийг боловсруулахад оролцсоноос гадна ЦЕГ, Хаан банктай хамтран хэрэгжүүлсэн “Ятгах тусам нягтал”, “Нягтлах тусам аюулгүй” зэрэг аянуудыг амжилттай хэрэгжүүлэхэд хувь нэмрээ оруулсан юм.