Эрхтэн, эд эс шилжүүлэн суулгах эмчилгээ хийж байгаа дэлхийн 93 улсаас эрх зүйн зохицуулалтгүй гурван 3 улс байгаагийн нэг нь манай улс юм. УИХ-ын чуулганы өнөөдөр (2026.04.23)-ийн үдээс хойшх хуралдаанаар Эрхтэн, эд эс шилжүүлэх тухай хуулийн төсөл болон хамт өргөн мэдүүлсэн төслүүдийн анхны хэлэлцүүлгийн үеэр УИХ-ын гишүүдээс гаргасан 72 зарчмын зөрүүтэй саналаар санал хурааж, эцсийн хэлэлцүүлэгт шилжүүллээ.

 

Хэлэлцэх асуудлын дарааллын дагуу Худалдаа, аж үйлдвэрийн танхимын тухай хуулийн төслийг хэлэлцэх эсэхийг хэлэлцэх үеэр УИХ дахь АН-ын бүлэг тав хоногийн завсарлага авав.

 

Хуралдааны төгсгөлд УИХ-ын Төрийн байгуулалтын байнгын хороо болон Хүний хөгжил, нийгмийн бодлогын байнгын хорооны даргыг сонгох санал хураалт явуулсан. Төрийн байгуулалтын байнгын хорооны даргад УИХ-ын гишүүн Б.Жавхланг 61,7 хувийн, Хүний хөгжлийн, нийгмийн бодлогын байнгын хорооны даргад УИХ-ын гишүүн П.Ганзоригийг 64,9 хувийн саналаар хуралдаанд оролцсон гишүүд дэмжиж УИХ-ын тогтоол батлагдлаа.